1

2

3

4

5

6

7

8

 auctore Georgio Acacio Enenckel L.Barone Hoheneccio
Argentorati MDCXIV

6

Siciliae magnitudo urbesque et gentes eam incolentes referuntur. Adversus quam Athenienses specie, ut Egestanis contra Syracusanos auxilio essent, re ipsa ut in suam dicionem redigerent insulam, expeditionem pararunt, classemque maximam et instructissimam Nicia et Alcibiade et Lysimacho ducibus eo miserunt. Haec in Corcyram primo inde Italiam veniens paulo post in Siciliam transmisit. Praeter Egestam Naxus quoque et Catana urbes Athenienses receperunt. Hinc Alcibiades ob Hermarum paraecisionem et alia crimina iam ante profectionem agitata veritus iudicium populi voluntarium exilium ivit. 

Cum Athenienses Catanae se castris tenerent, Syracusani feroces exercitum suum illuc miserunt. Qua occasione Athenienses nocte ad Syracusas classe circumvecti et loco idonea castra metati Syracusanos redeuntes acie vicerunt. Inde Catanam reversi. 

Alcibiades exul ab Lacedaemoniis accitus, ut Syracusanis ducem et auxilia mitterent ac Deceleam in Attica communirent, suasit. 

Aestate sequente Athenienses ad Syracusas reversi Epipolis captis acieque ibidem Syracusanis devictis urbem circummunire ordiuntur. Cum Syracusanis opera impedire conantibus aliquot proeliis secundo eventu pugnant, donec magna ex parte munitionibus urbem clauserunt. 

Gylippus ab Lacedaemoniis dux Syracusanis missus in Italiam venit. Athenienses Laconicae parte populata propalam foedus Lacedaemonium ruperunt.